อุปนิสฺสยปจฺจโย

[102] วิปาโก ธมฺโม วิปากสฺส ธมฺมสฺส อุปนิสฺสยปจฺจเยน ปจฺจโย – อนนฺตรูปนิสฺสโย, ปกตูปนิสฺสโย…เป.…ฯ

ปกตูปนิสฺสโย – กายิกํ สุขํ กายิกสฺส สุขสฺส, กายิกสฺส ทุกฺขสฺส, ผลสมาปตฺติยา อุปนิสฺสยปจฺจเยน ปจฺจโยฯ กายิกํ ทุกฺขํ กายิกสฺส สุขสฺส, กายิกสฺส ทุกฺขสฺส, ผลสมาปตฺติยา อุปนิสฺสยปจฺจเยน ปจฺจโยฯ ผลสมาปตฺติ กายิกสฺส สุขสฺส อุปนิสฺสยปจฺจเยน ปจฺจโยฯ (1)

วิปาโก ธมฺโม วิปากธมฺมธมฺมสฺส อุปนิสฺสยปจฺจเยน ปจฺจโย – อารมฺมณูปนิสฺสโย, ปกตูปนิสฺสโย…เป.…ฯ

ปกตูปนิสฺสโย – กายิกํ สุขํ อุปนิสฺสาย ทานํ เทติ, สีลํ สมาทิยติ…เป.… สงฺฆํ ภินฺทติฯ กายิกํ ทุกฺขํ อุปนิสฺสาย ทานํ เทติ, สีลํ สมาทิยติ…เป.… สงฺฆํ ภินฺทติฯ กายิกํ สุขํ กายิกํ ทุกฺขํ สทฺธาย…เป.… ปตฺถนาย อุปนิสฺสยปจฺจเยน ปจฺจโยฯ (2)

วิปาโก ธมฺโม เนววิปากนวิปากธมฺมธมฺมสฺส อุปนิสฺสยปจฺจเยน ปจฺจโย – อารมฺมณูปนิสฺสโย, อนนฺตรูปนิสฺสโย, ปกตูปนิสฺสโย…เป.…ฯ

ปกตูปนิสฺสโย – อรหา กายิกํ สุขํ อุปนิสฺสาย อนุปฺปนฺนํ กิริยสมาปตฺติํ อุปฺปาเทติ, อุปฺปนฺนํ สมาปชฺชติ, สงฺขาเร อนิจฺจโต ทุกฺขโต อนตฺตโต วิปสฺสติ, กายิกํ ทุกฺขํ อุปนิสฺสาย อนุปฺปนฺนํ กิริยสมาปตฺติํ อุปฺปาเทติ, อุปฺปนฺนํ สมาปชฺชติ…เป.…ฯ (3)

[103] วิปากธมฺมธมฺโม วิปากธมฺมธมฺมสฺส อุปนิสฺสยปจฺจเยน ปจฺจโย – อารมฺมณูปนิสฺสโย, อนนฺตรูปนิสฺสโย, ปกตูปนิสฺสโย…เป.…ฯ

ปกตูปนิสฺสโย – สทฺธํ อุปนิสฺสาย ทานํ เทติ…เป.… มานํ ชปฺเปติ… ทิฏฺฐิํ คณฺหาติฯ สีลํ… สุตํ… จาคํ… ปญฺญํ อุปนิสฺสาย ทานํ เทติ…เป.… ทิฏฺฐิํ คณฺหาติฯ ราคํ… โทสํ… โมหํ… มานํ… ทิฏฺฐิํ… ปตฺถนํ อุปนิสฺสาย ทานํ เทติ…เป.… สมาปตฺติํ อุปฺปาเทติ, ปาณํ หนติ…เป.… สงฺฆํ ภินฺทติ…เป.… สทฺธา…เป.… ปตฺถนา สทฺธาย… สีลสฺส…เป.… ปตฺถนาย อุปนิสฺสยปจฺจเยน ปจฺจโยฯ